Home /News /explained /

EXPLAINED WHY FACIAL RECOGNITION TECHNOLOGY IS VIEWED AS CONTROVERSIAL AND WHERE OTHER TECH COMPANIES AND POLICY MAKERS STAND ON IT GH SRD

Explained: వివాదస్పదమైన ఫేషియల్ రికగ్నిషన్ టెక్నాలజీకి ఫేస్‌బుక్ గుడ్ బై.. మిగతా కంపెనీల పరిస్థితి ఏంటి?

Facebook

Facebook

Explained: ఫేషియల్ రికగ్నిషన్ టెక్నాలజీ వినియోగం ఎందుకు వివాదాస్పదమైంది? ఇతర టెక్ కంపెనీలు ఈ టెక్నాలజీని ఎలా వినియోగిస్తున్నాయి? వంటి వివరాలు తెలుసుకుందాం.

ఫేస్‌బుక్ (Facebook) ఇటీవల 'ఫేషియల్ రికగ్నిషన్ టూల్'ను దశలవారీగా తొలగిస్తున్నట్లు ప్రకటించిన విషయం తెలిసిందే. సంస్థ ఆర్టిఫిషియల్ ఇంటెలిజెన్స్ వైస్ ప్రెసిడెంట్ జెరోమ్ పెసెంటి ఈ వివరాలను వెల్లడించారు. ఫేస్‌బుక్ యాక్టివ్ యూజర్లలో మూడింట ఒక వంతు మంది ఈ ఫీచర్‌ని వాడుతున్నట్లు అంచనా. ఇది ఉపయోగకరంగా ఉందని చాలామంది భావిస్తున్నప్పటికీ, కొన్ని కారణాల వల్ల ఈ టూల్‌ను ఫేస్‌బుక్ తొలగించక తప్పలేదు. దీని వినియోగంపై అనేక దేశాల నుంచి వ్యతిరేక ఎదురవ్వడమే ఇందుకు కారణం. ఈ నేపథ్యంలో ఫేషియల్ రికగ్నిషన్ టెక్నాలజీ వినియోగం ఎందుకు వివాదాస్పదమైంది? ఇతర టెక్ కంపెనీలు ఈ టెక్నాలజీని ఎలా వినియోగిస్తున్నాయి? వంటి వివరాలు తెలుసుకుందాం.

* ఫేషియల్ రికగ్నిషన్ టెక్నాలజీ అంటే ఏంటి? ఇది ఎలా పని చేస్తుంది?

ఫేషియల్ రికగ్నిషన్ టెక్నాలజీ అనేది ఫేస్‌బుక్ ఫోటోలు, వీడియోల్లోని యూజర్ల ముఖాలను స్కాన్ చేస్తుంది. ఒక వ్యక్తి ముఖాన్ని క్యాప్చర్ చేసి గుర్తిస్తుంది. డీప్ న్యూరల్ నెట్‌వర్క్‌లు, అధునాతన మెషీన్ లెర్నింగ్ అల్గారిథమ్‌ల ద్వారా ఈ డేటాను ఇప్పటికే ఉన్న డేటా బేస్‌కు మ్యాపింగ్ చేస్తుంది. దీని ఆధారంగా ఐడెంటిఫికేషన్, ట్యాగింగ్‌కు సంబంధించిన సూచనలు ఇస్తుంది. గూగుల్ ఫోటోస్, యాపిల్ ఫోటోస్ ప్లాట్‌ఫాంలలో కూడా ఒక వ్యక్తి ఫోటోలను గ్రూపింగ్ చేయడానికి ఈ టెక్నాలజీని వినియోగిస్తున్నారు. వ్యక్తుల ముఖాలను గుర్తించాలని ఈ యాప్స్‌ వినియోగదారులను కోరడం మనం చూస్తుంటాం. ఫేషియల్ రికగ్నిషన్ టెక్నాలజీ వల్లే ఇవన్నీ సాధ్యమయ్యాయి.

ఫేస్‌బుక్‌ యూజర్లు ఈ ఫీచర్‌కు తమ ఇష్ట ప్రకారం యాక్సెస్ ఇవ్వవచ్చు. తద్వారా స్నేహితులు లేదా కుటుంబ సభ్యులు ఈ ప్లాట్‌ఫాంలో ఇతరులు అప్‌లోడ్ చేసిన ఫోటోలు లేదా వీడియోల్లో యూజర్లు ఉంటే.. ఆ వివరాలను ఈ టెక్నాలజీ గుర్తిస్తుంది. అమెజాన్, మైక్రోసాఫ్ట్ వంటి కంపెనీలు ఈ సాంకేతికతను విస్తృతంగా వినియోగిస్తున్నాయి. కొన్ని ప్రభుత్వ సంస్థలు సైతం దీన్ని వినియోగిస్తున్నాయి. దీంతో ఈ టెక్నాలజీ ఉపయోగంపై ఆందోళనలు వ్యక్తమవుతున్నాయి.

* ఫేస్‌బుక్ ఎందుకు తొలగిస్తోంది?
ఫేస్‌బుక్ ఫేషియల్ రికగ్నిషన్ టూల్‌ను ఈ ప్లాట్‌ఫాంలో మాత్రమే ఉపయోగిస్తున్నారు. అయితే ఈ టెక్నాలజీ వినియోగం, వ్యక్తిగత గోప్యత, నైతికతపై ఇటీవల విమర్శలు ఎక్కువయ్యాయి. కొన్ని జాతుల వారి ముఖాలను ఈ టూల్ సరిగ్గా గుర్తించట్లేదనే ఆరోపణలు ఉన్నాయి. దీనికి సంబంధించి అమెరికాలోని ఇల్లినాయిస్ రాష్ట్రంలో పెండింగ్‌లో ఉన్న ఒక దావాను ఫేస్‌బుక్ ఇటీవల పరిష్కరించింది. ఫేస్ రికగ్నిషన్ టెక్నాలజీ రాష్ట్ర గోప్యతా చట్టాలను ఉల్లంఘిస్తోందని వాదించిన యూజర్ల బృందానికి దాదాపు $550 మిలియన్లు చెల్లించింది. దీనికి తోడు ఇటీవల ఫేస్‌బుక్ పాలసీలపై ప్రపంచ వ్యాప్తంగా వ్యతిరేకత పెరగడంతో ఈ టెక్నాలజీ వినియోగాన్ని ఫేస్‌బుక్ నిలిపివేస్తోంది.

* అమెజాన్ పరిస్థితి ఏంటి?
క్లౌడ్ సేవల్లో భాగంగా ఉపయోగిస్తున్న రికగ్నిషన్ సాఫ్ట్‌వేర్‌ను అమెజాన్ ‘సాఫ్ట్‌వేర్‌ యాజ్ ఎ సర్వీస్’ (Saas)గా అందిస్తోంది. అయితే ఈ రికగ్నిషన్ టెక్నాలజీపై సైతం విమర్శలు వస్తున్నాయి. లా, ఎన్‌ఫోర్స్‌మెంట్ సేవలకు సైతం అమెజాన్ ఈ టెక్నాలజీని అందిస్తోంది. పోలీస్ ఎన్‌ఫోర్స్‌మెంట్ డిపార్ట్‌మెంట్స్‌లో రికగ్నిషన్‌ టెక్నాలజీ వాడకం పెరిగింది. వ్యక్తులను ట్రాక్ చేయడం, విశ్లేషించడం ఈ సాఫ్ట్‌వేర్ ప్రత్యేకత. ఒకే ఫోటోలో ఉండే 100 మంది వ్యక్తులను కూడా ఈ టెక్నాలజీ గుర్తించగలదు. కానీ ఈ టెక్నాలజీ అత్యంత కచ్చితమైనది కాదని అమెరికన్ సివిల్ లిబర్టీస్ యూనియన్ (ACLU) గతంలో వెల్లడించింది.

అమెజాన్ ఫేషియల్ రికగ్నిషన్ టెక్నాలజీని పోలీసులు ఉపయోగించడంపై ఒక సంవత్సరం తాత్కాలిక నిషేధం విధిస్తున్నట్లు అమెజాన్ గత సంవత్సరం ప్రకటించింది. కానీ మానవ అక్రమ రవాణా బాధితులను రక్షించడంతో పాటు తప్పిపోయిన పిల్లలను గుర్తించి వారి కుటుంబాలతో తిరిగి కలపడంలో సహాయపడేందుకు ఈ టెక్నాలజీని అమెజాన్ అందిస్తూనే ఉంది. ఈ టెక్నాలజీ కచ్చితత్వంపై కూడా విమర్శలు ఉన్నాయి. నల్లజాతి వారికి ముఖ్యంగా ఆఫ్రికన్-అమెరికన్‌లను గుర్తించడంలో ఈ టెక్నాలజీ సరిగ్గా పనిచేయట్లేదు. ఫలితంగా ఇది తప్పుడు అరెస్టులకు, మరింత వివక్షకు దారితీయవచ్చనే ఆందోళనలు వ్యక్తమవుతున్నాయి.

* ఇతర టెక్ కంపెనీల సంగతేంటి?
జూన్ 2020లో మైక్రోసాఫ్ట్ కూడా ఇలాంటి టెక్నాలజీ వినియోగాన్ని పరిమితం చేసింది. యూఎస్‌లో ఇలాంటి టెక్నాలజీ, టూల్స్‌ను నియంత్రించే ఫెడరల్ చట్టం అమల్లోకి వచ్చే వరకు ప్రభుత్వ సంస్థలకు ఈ సాఫ్ట్‌వేర్‌ను విక్రయించమని మైక్రోసాఫ్ట్‌ పేర్కొంది. మైక్రోసాఫ్ట్ (Face API) పేరుతో ఈ టెక్నాలజీని అభివృద్ధి చేసింది. IBM సైతం గత ఏడాది జూన్‌లో ఫేస్ రికగ్నిషన్ బిజినెస్ నుంచి పూర్తిగా వైదొలగుతున్నట్లు ప్రకటించింది. అమెరికాలో ఈ టెక్నాలజీ వినియోగంపై నిబంధనలు రూపొందించాలని కోరుతూ IBM CEO అరవింద్ కృష్ణ US కాంగ్రెస్‌కు ఒక లేఖ రాశారు. ఈ విషయంలో తాము పారదర్శకతకు ప్రాధాన్యం ఇస్తామని ఆయన ప్రకటించారు.

* ఫేషియల్ రికగ్నిషన్ వాడకంపై గూగుల్ ఏమంటోంది?
ఫేస్ రికగ్నిషన్ టెక్నాలజీ వాడకంపై తాత్కాలిక నిషేధం విధించినందుకు.. 2020 జనవరిలో ఆల్ఫాబెట్, గూగుల్ సీఈఓ సుందర్ పిచాయ్ యూరోపియన్ యూనియన్‌ను అభినందించారు. ఈ సాంకేతికత సమస్యాత్మక స్వభావం గురించి గూగుల్ బహిరంగంగానే ప్రకటనలు ఇస్తోంది. AI రెస్పాన్సిబిలిటీస్ డిక్లరేషన్‌లో భాగంగా ఫేస్ రికగ్నిషన్ టెక్నాలజీ వినియోగంపై కూడా గూగుల్ ప్రశ్నలు లేవనెత్తింది. ఈ టెక్నాలజీ వాడకం న్యాయబద్దంగా ఉండాలని, నిబంధనలను ఉల్లంఘించే విధంగా ఉండకూడదని పేర్కొంది.

* టెక్నాలజీ వాడకంపై ప్రభుత్వాలు ఏం చెబుతున్నాయి?
ఫేషియల్ రికగ్నిషన్‌ టెక్నాలజీని సామూహిక నిఘా కోసం ఉపయోగిస్తున్నారనే ఆందోళనలు ఉన్నాయి. దీన్ని ప్రభుత్వాలు, ప్రభుత్వ సంస్థలు అక్రమంగా వినియోగిస్తున్నాయనే ఆరోపణలు ఉన్నాయి. చైనాలో ముస్లిం మైనారిటీలైన వీఘర్లను ట్రాక్ చేయడానికి ప్రభుత్వం ఈ సాంకేతికతను ఉపయోగించింది. UK కూడా 2020లో జరిగిన ఫుట్‌బాల్ మ్యాచ్‌కి వచ్చే అభిమానులను పర్యవేక్షించడానికి ఈ టెక్నాలజీని ఉపయోగించింది. భారతదేశంలో కూడా నిరసనల సమయంలో పోలీసులు ఫేస్ రికగ్నిషన్ టెక్నాలజీని ఉపయోగించడంపై ఆందోళనలు ఉన్నాయి.

ఇది కూడా చదవండి : HIV-AIDS: మానవజాతి హెచ్‌ఐవీ-ఎయిడ్స్ అంతాన్ని చూసే సమయం ఆసన్నమైంది: హార్వర్డ్ ప్రొఫెసర్

USలో ఫేషియల్ రికగ్నిషన్, బయోమెట్రిక్ టెక్నాలజీ మారటోరియం చట్టాన్ని కొంతమంది కాంగ్రెస్ సభ్యులు ప్రతిపాదించారు. ఇది ఫెడరల్ సంస్థలు సాంకేతికతను ఉపయోగించడాన్ని నిషేధిస్తుంది. తదుపరి పరిశీలన కోసం బిల్లును హౌస్ కమిటీలకు పంపారు. ఫేస్‌ రికగ్నిషన్ టెక్నాలజీని పోలీసులు ఉపయోగించడాన్ని నిషేధిస్తూ యూరోపియన్ యూనియన్ తీర్మానాన్ని ఆమోదించింది.
Published by:Sridhar Reddy
First published:

Tags: Facebook, Technology

ఉత్తమ కథలు

తదుపరి వార్తలు