Currency in circulation: డీమానిటైజేషన్ ఫలాలు శూన్యం...వ్యవస్థలోకి భారీగా వచ్చిపడ్డ కరెన్సీ...

(ప్రతీకాత్మక చిత్రం)

Currency in circulation: వ్యవస్థలోకి భారీగా చేరుతున్న నగదు.. ప్రస్తుతం చెలామణిలో ఉన్న మొత్తం కరెన్సీ విలువ రూ.28.6 లక్షల కోట్లు

  • Share this:
దేశంలో చెలామణిలో ఉన్న మొత్తం కరెన్సీ 20 ఏళ్ల గరిష్టానికి చేరుకుంది. 2021 మార్చి చివరి నాటికి చెలామణిలో ఉన్న మొత్తం కరెన్సీ లేదా వ్యవస్థలోని నగదు రూ.28.6 ట్రిలియన్లకు (రూ.28,60,000 కోట్లకు) చేరుకుంది. గత ఏడాదితో పోలిస్తే వ్యవస్థలో ఉన్న మొత్తం కరెన్సీ విలువ 16.8 శాతం పెరగడం విశేషం. భారత ఆర్థిక వ్యవస్థ పరిమాణంతో పోల్చినప్పుడు ఈ నగదు వాస్తవ విలువ తెలుస్తుంది. ఇందుకు చెలామణిలో ఉన్న కరెన్సీని స్థూల జాతీయోత్పత్తి లేదా GDPతో విభజించాలి. 2021 మార్చి నాటికి చెలామణిలో ఉన్న కరెన్సీ, జీడీపీల నిష్పత్తి 14.6 శాతంగా ఉంది. గత ఏడాది మార్చి నాటికి ఈ నిష్పత్తి 12 శాతంగానే ఉండటం విశేషం. ఇది 260 బేసిస్ పాయింట్ల పెరుగుదల కావడం విశేషం. ఇంతకు ముందు ఎప్పుడూ ఈ స్థాయిలో నగదు చెలామణి పెరగలేదని నిపుణులు విశ్లేషిస్తున్నారు. పెద్దనోట్ల ఉపసంహరణ చేసిన తరువాతి సంవత్సరం కూడా ఈ స్థాయిలో నగదు చెలామణి పెరగలేదు.

కరోనా కారణంగా 2020-21 ఆర్థిక సంవత్సరానికి నామమాత్రపు జీడీపీ అంచనా (ద్రవ్యోల్బణం కోసం సర్దుబాటు చేయని గణాంకాలు) రూ.195.9 ట్రిలియన్లకు తగ్గింది. 2019-20లో ఇది రూ.203.5 ట్రిలియన్లుగా ఉంది. ఈ తేడాల వల్ల నగదు చెలామణి, జీడీపీ నిష్పత్తి కొంత వరకు పెరిగింది. భారతదేశంలో రెండవ దశ కోవిడ్ విజృంభణకు ముందే 2020-21 సంవత్సరానికి జీడీపీని అంచనా వేశారు. అందువల్ల అసలు జీడీపీ, అంచనా వేసిన లెక్కల కంటే తక్కువగా ఉండే అవకాశం ఉంది. రెండో దశలో కరోనా ఉద్ధృతి వల్ల ఆర్థిక కార్యకలాపాలు మరింత దెబ్బతినే అవకాశం ఉండటం ఇందుకు కారణం. అంటే ఇప్పటి వరకు తేల్చిన నగదు చెలామణి, జీడీపి నిష్పత్తి 14.6 శాతం కంటే ఎక్కువగా ఉంటుంది.

* నగదు చెలామణి పెరగడానికి కేవలం GDP తగ్గుదల మాత్రమే కారణం కాదు. 2020-21లో వ్యవస్థలో చలామణి అవుతున్న కరెన్సీ 16.8 శాతానికి పెరిగి రూ.28.6 ట్రిలియన్లకు చేరుకుంది. గత 20 ఏళ్లలో ఇదే ఎక్కువ కావడం విశేషం. 2010-11లో ఇది 18.8 శాతం పెరిగింది. ఆ తరువాత ప్రస్తుతం నమోదైన గణాంకాలే అత్యధికం. నిజానికి 2017-18లో ఈ నిష్పత్తి 37 శాతానికి పెరిగింది. కానీ 2016 నవంబర్లో పెద్ద నోట్ల రద్ధు కారణంగా తరువాతి సంవత్సరంలో నగదు చెలామణి అమాంతం పెరిగింది. ఆ సంవత్సరం సుమారు 86 శాతం కరెన్సీని ప్రభుత్వం రద్దు చేసింది. ఆ తరువాత 2017-18 ఆర్థిక సంవత్సరంలో నగదు చెలామణి పెరిగింది. దీనికి జీడీపీతో సంబంధం లేదు.

* మహమ్మారి వ్యాప్తితో ప్రజలు బ్యాంకుల నుంచి ఎక్కువ డబ్బును విత్‌డ్రా చేసుకున్నారు. అత్యవసర పరిస్థితుల్లో ఇబ్బందులు ఎదురు కాకుండా ముందుజాగ్రత్తగా డబ్బు తీసుకుంటున్నారు. అందువల్ల గత ఏడాది నుంచి ఎక్కువ లావాదేవీలు నగదు రూపంలోనే జరుగుతున్నాయి. కరోనా లాక్‌డౌన్ తరువాత ప్రజలు, కార్మికులు అందరూ తిరుగు ప్రయాణాలకు భారీగా డబ్బు ఖర్చు చేశారు. రవాణా రంగంలోని చెల్లింపులన్నీ నగదు రూపంలోనే జరిగాయి. మహమ్మారి బారిన పడిన వారికి సేవలందించే ఆసుపత్రులు ఆన్‌లైన్ విధానానికి బదులుగా నగదు రూపంలోనే చెల్లింపులు చేయాలని కోరుతున్నాయి. కోవిడ్ చికిత్సకు మందులు, ఇతర అవసరాల కోసం కూడా నగదు రూపంలోనే చెల్లింపులు చేస్తున్నారు. ఫలితంగా చెలామణిలోకి వచ్చిన నగదు భారీగా పెరిగింది.

ప్రజలు సంపాదించే డబ్బును బ్యాంకుల్లో జమ చేయలేకపోవడం వల్ల కూడా వ్యవస్థలోని నగదు పెరుగుతోంది. 2017 మార్చి నుంచి ప్రతి సంవత్సరం వ్యవస్థలోకి వస్తోన్న నగదు పెరుగుతోంది. అప్పట్లో పెద్దనోట్ల ఉపసంహరణ తరువాత ఈ పెరుగుదల నమోదవుతోంది.
Published by:Krishna Adithya
First published: