COVID-19 hospital bills: హెల్త్‌ ఇన్సూరెన్స్‌లో కరోనా బిల్లులన్నీ క్లెయిం చేసుకోవచ్చా? అన్నింటికీ డబ్బులు తిరిగి ఇస్తారా?

ప్రతీకాత్మక చిత్రం

దేశంలో కరోనా మహమ్మారి దేశ వ్యాప్తంగా కల్లోలం సృష్టిస్తోంది. గతంలో కంటే సెకండ్ వేవ్ సమయంలో అనేక మంది ఆస్పత్రుల పాలవుతున్నారు. అయితే కోవిడ్ ఆస్పత్రి బిల్లులన్నీ హెల్త్ ఇన్సూరెన్స్ కింద రీయింబర్స్ మెంట్ అవుతాయా? లేదా? అన్న సందేహాలు అనేక మందిలో వ్యక్తమవుతున్నాయి.

  • Share this:
దేశంలో కరోనా మహమ్మారి ఉద్ధృతి తారస్థాయికి చేరింది. దీంతో ఎవరు, ఎప్పుడు కరోనా బారిన పడతారా అనేది తెలియని ఆందోళనకర పరిస్థితి అందరిలో వ్యక్తమవుతోంది. ఈ క్రమంలో ఇప్పటికే కరోనా బారిన పడినవారు ఇప్పుడిప్పుడే కోలుకుంటున్నారు. కొంతమంది ఇబ్బంది ఎక్కువై ఆస్పత్రిలో చేరుతున్నారు. ఇలాంటివారికి హెల్త్‌ ఇన్సూరెన్స్‌ పాలసీ ఉంటే కాస్త ఇబ్బంది తగ్గుతుందనే చెప్పాలి. అయితే కరోనా బిల్లులన్నింటినీ హెల్త్‌ ఇన్యూరెన్స్‌ పాలసీ వెనక్కి చెల్లించదని కొంతమంది చెబుతున్నారు. అసలు కొవిడ్‌ బిల్లుల్లో వేటిని హెల్త్‌ పాలసీ కింద అప్లై చేయవచ్చు? వేటికి డబ్బులు వెనక్కి ఇస్తారు? అనే వివరాలు తెలియక అనేక మంది ఇబ్బంది పడుతున్నారు. వారి కోసం ఈ వివరాలు..

హెల్త్‌ ఇన్సూరెన్స్ పాలసీ తీసుకునేటప్పుడు.. అది వేటికి వర్తిస్తుంది, దాని పరిధిలోకి ఏవేవి వస్తాయనేది డాక్యుమెంట్‌లో పొందుపరుస్తారు. దాని మీద సంతకాలు కూడా పెట్టి ఉంటారు. అయితే ఈ క్రమంలో ఆ డాక్యుమెంట్‌ను పూర్తిగా చదివేవారు చాలా తక్కువ ఉంటారు. ఆ డాక్యుమెంట్‌లోనూ ఈ బిల్లుల లెక్కలు కూడా ఉంటాయి. అంటే ఆస్పత్రికి బిల్లులో వేటికి పాలసీ రీయింబర్స్‌మెంట్‌ ఉంటుంది, వేటికి ఉండదు అనేది అందులో రాస్తారు. వాటి ప్రకారం చూస్తే... పాలసీ వెయిటింగ్‌ పీరియడ్‌ కంటే ముందు ఉన్న వ్యాధులకు పాలసీ వర్తించదు. అలాగే హెర్నియా సర్జరీ, కాటరాక్ట్‌ సర్జరీలు కూడా పాలసీ కిందకు రావు.

కరోనా ట్రీట్‌మెంట్‌ బిల్లులను హెల్త్‌పాలసీ కింద రీఎంబర్స్‌మెంట్‌ కోసం అప్లై చేసేవారికి ఇటీవల కాలంలో ఇబ్బందులు పెరుగుతున్నాయి. ఇన్సూరెన్స్‌ కంపెనీలు, ఆసుపత్రుల మధ్య పాలసీదారులు ఇబ్బందులు పడుతున్నారు. కరోనా ట్రీట్‌మెంట్‌ కోసం పెట్టిన ఖర్చులో 50 నుంచి 55 శాతం వరకు మాత్రమే పాలసీదారులకు వెనక్కి వస్తోంది. మిగతా 45 నుంచి 50 శాతం మొత్తాన్ని పాలసీదారులు సొంతంగా చెల్లించాల్సి వస్తోంది.

ఆస్పత్రులు, బీమా కంపెనీల మధ్య తేడాలు వచ్చిన ఖర్చులు చూసుకుంటే తొలుతగా పీపీఈ కిట్ల గురించి చెప్పుకోవాలి. ఇవి కన్జ్యూమబుల్స్‌ కిందకు రావడమే కారణం. దాంతోపాటు తొలినాళ్లలో వాటి ధరలు ఎక్కువగా ఉండటమూ కారణమే. మొదట్లో ఇన్సూరెన్స్‌ కంపెనీలు ఈ కారణాల వల్ల వాటిని పాలసీ రీఎంబర్స్‌మెంట్‌ కిందకు తీసుకురాలేదు. కరోనా కేసులు వచ్చిన తొలి రోజుల్లో కోవిడ్‌ బిల్లుల్లో వీటి భాగం ఎక్కువగా ఉండటమూ ఓ కారణమే. అయితే ఆ తర్వాత వాటి ధర తగ్గినా ఇంకా రీఎంబర్స్‌ జాబితాలో చేర్చలేదు.

దీంతోపాటు జనరల్‌ ఇన్సూరెన్స్ కౌన్సిల్‌ తొలుత పీపీఈ కిట్ల క్యాప్‌గా రూ. 1200 నుంచి రూ. 2000 పెట్టింది. అంటే ఒక రోజు ఆసుపత్రి బిల్లులో పీపీఈ కిట్‌కి అయ్యే ఖర్చు ఇంతే ఉండాలి. దాంతోపాటు ఒక రోజు ఒక పీపీఈ కిట్‌కి మాత్రమే రీయింబబర్స్‌ ఇస్తారు. బిల్లులో వేసే బిల్లులో శానిటైజేషన్‌ ఛార్జీలు ఉండటాన్ని ఇన్సూరెన్స్‌ కంపెనీలు అంగీకరించడం లేదు. అవి హాస్పిటల్‌ ఛార్జీల్లో కలిపి ఉండాలే తప్ప వేరేగా ఎలా రాస్తారు అని అడుగుతున్నారు. అయితే కరోనా టైమ్‌లో శుభ్రత కోసం ఎక్కువ ఖర్చవుతోంది కాబట్టే అవి పేషెంట్‌ లెక్కలో రాస్తున్నామని ఆసుపత్రులు చెబుతున్నాయి.

కరోనా ట్రీట్‌మెంట్‌ కోసం వినియోగించే నెబ్యులైజర్‌ కిట్లు, స్టీమ్‌ ఇన్‌హీలర్లు, థర్మామీటర్ల ఖర్చు కూడా హెల్త్‌ ఇన్సూరెన్స్‌ రీఎంబర్స్‌మెంట్‌ కింద వెనక్కిరాదు. వీటితోపాటు నర్సులు, అటెండెట్‌లకు ఇచ్చే ఛార్జీల విషయంలో ఆరోగ్య భీమా వర్తించదు. అయితే గ్రూప్‌ హెల్త్‌ ఇన్సూరెన్స్ పాలసీ తీసుకున్నవారికి వీటిలో కొంతమేర వెసులుబాటు ఉంటుంది. పాలసీ తీసుకునేటప్పుడు మీరు పని చేసే సంస్థతో జరిగిన ఒప్పందాల్లో భాగంగా ఇన్సూరెన్స్‌ కంపెనీలు ఇలాంటి వైద్య రహిత ఖర్చులు (నాన్‌ మెడికల్‌ ఎక్స్‌పెన్షస్‌) చెల్లించేలా రాసుకుంటారు. దీని వల్ల గ్రూప్‌ మెడిక్లయిమ్‌ పాలసీదారులకు ఈ విషయంలో కాస్త ఊరట లభిస్తుంది.
Published by:Nikhil Kumar S
First published: